Mabanja 117 akusowa pokhala ku ndirande

Mabanja 117 ndiwo anakhudzidwa ndi ngozi ya madzi osefukira ndinso mphepo ya mphamvu yomwe inakhudza dera la Ndirande munzinda wa Blantyre pa 4 January chaka chino.

Malingana ndi lipoti la nthambi yowona ngozi zogwa mwadzidzidzi ku khonsolo ya nzinda wa Blantyre, ngoziyi inakhudza madera a makhansala atatu omwe ndi Makata, Matope ndi Gamulani.

Lipotili latinso, anthu khumi ndiwo anavulala ndipo palibe yemwe anamwalira komanso malonda a anthu makumi awiri anawonongeka omwe ndi a ndalama pafupifupi K20 million.

Nyumba zokwana 115 zinawonongeka denga pomwe ziwiri zinagweratu kupangitsa kuti eni ake asowe pokhala.

Pangoziyi, mpanda wa sukulu ya pulayimale ya Makata unagwa.

Follow avantmalawi.com